Mark 15

Jesus i mua o Pilate

(Matthew 27.1,2,11-14; Luke 23.1-5; John 18.28-38)

1Luada loo, gei tagi aamua hai mee dabu gu limalima di heetugi gi nia dagi mmaadua, digau haga dondonu haganoho, digau hai gabunga aamua huogodoo, ga haga taaele di nadau hai. Digaula ga lawalawa a Jesus gi tiini baalanga, ga lahi gi Pilate. 2Gei Pilate ga heeu gi mee, “Ma kooe dela go di king o digau o Jew?”

Gei Jesus ga helekai, “Dela gu helekai iei goe.” 3Nia dagi hai mee dabu gu hagahuaidu a Jesus i nia mee e logo. 4Malaa, Pilate ga heeu labelaa gi mee, “Goe hagalee helekai gi nia helekai digaula? Hagalongo gi nia hagahuaidu huogodoo digaula i doo gili!” 5Jesus e noho dee muu labelaa, gei Pilate gu gologolo huoloo.

Jesus gu hagamodu bolo e hagamahemahe

(Matthew 27.15-26; Luke 23.13-25; John 18.39—19.16)

6Nia Hagamiami Pasoobaa huogodoo, gei Pilate e nnoo mau e hai gi hagamehede dana dangada galabudi dela e hiihai ginai nia daangada. 7Taane go Barabbas nogo galabudi madalia digau hai baahi ala ne daaligi nia daangada gi mmade i lodo nneebagi. 8Digau dogologo ne dagabuli mai, ga daamada ga huuhuli a Pilate gi heia go dana hai dela nogo haihai ang gi ginaadou. 9Mee ga heeu, “Goodou e hiihai bolo au gi haga mehede ina adu di king o digau o Jew?” 10Mee gu iloo humalia, bolo nia dagi hai mee dabu la ne wanga a Jesus gi deia, i di nadau dubua i mee. 11Gei nia dagi hai mee dabu ga huuhuli digau dogologo aalaa gi helekai gi Pilate gi hagamehede ina a Barabbas. 12Pilate ga helekai labelaa gi digaula, “Malaa di aha dela e hiihai ginai goodou au gi heia gi taane dela e gahi goodou bolo di king o digau o Jew?” 13Gei digaula ga wwolo, “Daudaulia a mee!” 14Pilate ga heeu, “Malaa, di huaidu aha, dela ne hai go mee?”

Gei digaula ga wwolo labelaa gi nonua, “Daudaulia a mee!” 15Pilate e hiihai e haga manawa lamalia lodo digau dogologo aalaa, dela ga hagamehede a Barabbas gi digaula, nomuli geia ga dugu ang gi digaula gi haga mamaawa ina Jesus, gi daudaulia a mee.

Digau dauwa e haga balumee Jesus

(Matthew 27.27-31; John 19.2,3)

16Digau dauwa ga lahi a Jesus gi lodo di abaaba di hale gobinaa, ga gahigahi mai nadau ihoo gau dauwa huogodoo. 17Digaula ga haga ulu a Jesus gi di gahu mmee uli, ga bini di nadau hau laagau duduia, ga wanga gi di libogo o maa. 18Gei digaula ga pala ga hagaaloho gi mee ga helekai, “Di king o digau o Jew gi mouli waalooloo!” 19Gei digaula ga haga mamaawa dono libogo gi di laagau, ga buibui nadau haawale gi mee, ga dogoduli, ga palapala gi mee. 20Ga lawa loo di nadau hagahuaidu a mee, ga daa gi daha di gahu mmee uli, ga haga ulu a mee labelaa gi ono gahu donu, ga dagi a mee gi tua di waahale e daudau i di loobuu.

Di daudau o Jesus

(Matthew 27.32-44; Luke 23.26-43; John 19.17-27)

21Digaula ga heetugi gi taane, dono ingoo go Simon tangada o Cyrene, tamana o Alexander mo Rufus. Mee ne haneia i tenua gi di waahale deelaa, gei digau dauwa ga hai a mee gi aamo ina di loobuu o Jesus. ^a 22Digaula ga lahi a Jesus gi di gowaa dela e haga ingoo bolo Golgotha, dela dono hadinga boloo, “Di Gowaa Hangaibu Libogo”. 23Digaula ga hagamada ga wanga nadau waini gu wanii gi nia ‘myrrh’, gei Jesus digi inu nia maa. 24Gei digaula ga daudau a mee, ga duwwe nia gahu o maa i ginaadou. Ga huduhudu nadau dais belee halahala be dehee di mee gahu ga kae go tangada. ^b 25Di laa e hiwa luada dela ne daudau iei mee. 26Di haga modongoohia taudau o maa, gu hihi gi hongo di loobuu, “Di king o digau o Jew”. 27Digaula gu daudau labelaa nadau daane huaidu dogolua i baahi o mee, e dahi i dono baahi gau donu, ge dahi i dono baahi gau ihala. 28[Di Beebaa Dabu e hai donu i telekai deenei,

“Mee gu dau dalia digau huaidu.”] ^c
29Nia daangada ma ga loomoi laa laa, le e lialiagi nadau libogo mo di haganneennee a Jesus, ga helehelekai, “Hahaa! Ma kooe dela belee oho di Hale Daumaha, ga haga duu aga labelaa i lodo nia laangi e dolu! ^d 30Doo ia gi daha , heia goe gi mouli!” 31Nia dagi hai mee dabu, mo digau haga dondonu haganoho, e haganneennee labelaa a Jesus, ga helehelekai, “Mee e mee di haga mouli nia daangada, gei e deemee di haga mouli ia! 32Heia gimaadou gi gidee di Mesaia, di king o digau Israel, e doo ia gi lala mo di loobuu dolomeenei, gei gimaadou ga hagadonu laa goe!”

Nia daane ala ne daudau dalia a mee e haganneennee labelaa a Jesus.

Di made o Jesus

(Matthew 27.45-56; Luke 23.44-49; John 19.28-30)

33I di oodee, gei tenua hagatau gu bouli dongoeho, ga dae loo gi di laa e dolu. 34I di laa e dolu, gei Jesus ga dangi gi nua,“Eloi, Eloi, Lama, Sabaktani?” dono hadinga boloo, “Dogu God, dogu God, goe gu diiagi au beleiaha?” ^e 35Hunu gau ala e tuu i golo ga longono, ga helekai, “Hagalongo, mee e gahigahi a Elijah!” 36Tangada i digaula ga lele, ga kae dana liimi, ga hui gi lodo nia waini, ga dui gi di ngudu di laagau, ga togo gi nia malau ngudu o Jesus, ga helekai, “Daalia, gi mmada gidaadou be Elijah e hanimoi e dugu ia a mee!” ^f 37Jesus ga dangi gi nua, ga hagaodi ono madangi. 38Di gahu duuli nogo dau i lodo di Hale Daumaha, gu mahaa lua ia i nua, ga hana loo ga tugi i lala. ^g 39Tagi dauwa nogo duu i mua di loobuu, ne gidee ia di made o Jesus, ga helekai, “Taane deenei la go tama donu a God. 40Nia ahina nogo i golo, e mmada mai i daha. Mary mai Magdala, mo Mary tinana o Seims dulii mo Joseph, mo Salome, nogo i baahi digaula. ^h 41Aanei go digaula nogo madalia a Jesus i Galilee, nogo hagamaamaa a mee. Gei nia ahina dogologowaahee ala i golo, ne lloomoi dalia a mee gi Jerusalem.

Di danu o Jesus

(Matthew 27.57-61; Luke 23.50-56; John 19.38-42)

42Hiahi ia di mee, gei Joseph tangada o Aremethea ga dau mai. 43Mee tangada hagalabagau i lodo digau hai gabunga aamua, ge e talitali hogi Tenua o God. Di laangi deelaa la di Laangi Hagatogomaalia, dela di laangi i mua di Laangi Sabad, malaa, Joseph ga hana hagamahi gi mua o Pilate belee madau tuaidina o Jesus. 44Pilate gu homouli huoloo i dana longono bolo Jesus gu made, geia ga gahi mai tagi dauwa, belee heeu be di maa e donu, bolo Jesus la gu made. 45Dono modongoohia di made o Jesus mai tagi dauwa, gei mee ga hagi ang gi Joseph gi kae ina tuaidina o Jesus. 46Joseph ga hui dana gahu lenge, ga dugu ia tuaidina o maa gi lala, ga hii a mee gi di gahu deelaa, ga dugu gi lodo taalunga dela ne hodo gi lodo tadugalaa. Ga lawa ga haga daga mai tadugalaa damana, ga pono di bontai taalunga. 47Mary mai Magdala, mo Mary tinana o Joseph nogo i golo, gu gidee di gowaa dela e dugu ai tuaidina o Jesus.